Kilala Mo Ba Ang Iboboto Mo?

Halos 2 buwan na lang ang nalalabi at ako'y kabilang sa mahigit 550,000 overseas voters mula sa iba't ibang panig ng mundo na muling boboto para sa susunod na mamumuno sa ating bansa. Isang hamon sa aking katauhan upang kilatisin maigi ang karapat dapat na pagkalooban ko ng aking boto sa Mayo 10.

Subalit ngaun lamang nangyari sa akin buhay bilang isang botanteng Pinoy na sa nalalabing 2 buwan, mula sa aking masusing pananaliksik ay wala pa rin akong napipiling na kandidato na mamanukin sa 2010 Election.

Haba kong sinusubaybayan ang mga nangununang politiko sa pamamagitan ng internet na hayagang namimili ng boto sa pamamagitan ng malawak na paglustay ng milyon milyong salapi sa Political Media Campaign, di ko alam kung karapat dapat pa silang pagkalooban ng aking boto habang ang nakararaming Pilipino ay nagugutom at walang pagkain sa kanilang hapag kainan at malinis na tubig na maiinom. 

Kung iipunin ang kabuuang halaga na ginastos sa Political Media Campaign ng lahat ng kandidato, siguro'y makasasapat ito upang matustusan ang mga gutom na sikmura ng pobreng Pilipino o kung ilalagak ang salapi sa makabuluhang proyekto na lilikha ng bagong trabaho, maraming Pilipino ang mabibigyan ng tunay at bagong pag-asa, pero hindi mangyayari ito, dahil sa politika walang kawang gawa, isang larong kailangang mamayagpag sa paningin ng publiko ang kandidatong madalas nakikita sa TV o naririnig sa radyo upang makasiguro ng boto, isang paniniwalang hindi ko masikmura.

May isang politiko na nilangoy ang dagat ng basura at ginamit ang mga bata sa kanyang kampanya na nagmistulang phedopile sa aking paningin at nasasangkot sa anomalya sa C5 at ngaun ay sa isyung suhulan.

Ang isang politiko naman ay nagsabing hindi sya magnanakaw kapag sya ay nahalal, na nakasakay sa alapaap ng popularidad ng kanyang mga magulang, subalit hindi lang naman ito ang basehan upang maging Pangulo, kailangan ay may matibay na plataporma ukol sa mga isyung kumakaharap sa ating lipunan.

At ang pangatlo naman'y patung patong na demanda at pagkakakulong dahil sa kasong pandarambong ay tila pinaniniwalaan pa rin ng masang Pilipino, ganito na ba kababa ang mentalidad ng tinatawag na masang Pilipino upang sya ay pumangatlo sa tinatawag na survey ng bayan?

Ang isang kandidato naman'y mas kilala bilang kaalyado ng Gobyerno na tila sa kalituhan ng pamahalaan at ng kanyang partido ay sya'y napabayaan dahil sa kanilang paghahabol sa bagong karera ni Gloria sa pagiging Kongresista ng Pampangga. Nais sana kitang bigyan ng boto pero sa iyong mistulang pag-iisa sa iyong pakikibaka, malamang na hindi ko rin maibigay sa iyo ang aking boto, baka sa susunod, sa taong 2016 ikaw muling makilala.

May ilan pang mga kandidato sa pagka-Pangulo na tila mga sugong propeta na may hatid na pangakong milagro sa naghihikahos na lipunan ng ating bansa. Mahigit pa sa sakit na ketong ang suliranin ng ating bansa, hindi kita iboboto kung dadaanin mo lang ako sa pakanta kanta  sa entablado o pagbisita sa palengke ng galunggong upang malaman ang tunay na halaga nito sa merkado.

Wala pang laman ang aking listahan ng iboboto sa pagka-Pangulo at Pangalawang Pangulo kailangan ko pang lubusin ang pagkakakilala sa kanila. Sa 12 Senador, dalawa pa lang ang nasa aking listahan, sila ay inyong makikilala sa susunod na kabanata.

Ikaw, kilala mo ba ang iboboto mo?


Ang larawan ay mula sa amBisyon2010 Facebook fan page.